ಪಶ್ಚಿಮ ಆಫ್ರಿಕಾದ ಅಟ್ಲಾಂಟಿಕ್ ಮಹಾ ಸಮುದ್ರ ದಡದಲ್ಲಿ ಅತಿ ತೀಕ್ಷ್ಣೋಷ್ಣಾಂಶ ಭೌಗೋಳಿಕ ಪ್ರದೇಶವಾಗಿದೆ ಮೌರಿಟಾನಿಯ. ಅರಬ್ – ಬರ್’ಬರ್ ಸಂಸ್ಕೃತಿ ಮತ್ತು ಆಫ್ರಿಕನ್ ಸಂಪ್ರದಾಯವನ್ನು ಒಟ್ಟಿಗೆ ಮೈಗೂಡಿಸಿಕೊಂಡಿರುವ ಈ ಸಣ್ಣ ದೇಶವು ತನ್ನ ಪ್ರಾಕೃತಿಕ ವೈವಿಧ್ಯತೆ ಹಾಗೂ ವ್ಯತಿರಿಕ್ತ ಜನಜೀವನ ಶೈಲಿಯ ಮೂಲಕ ಜಗಜ್ಜಾಹೀರುಗೊಂಡಿದೆ. ಶೇಕಡಾ ತೊಂಬತ್ತರಷ್ಟೂ ಸಹರಾ ಮರುಭೂಮಿಯಿಂದಾವ್ರತಗೊಂಡಿರುವ ಕಾರಣ ಇದು ಉಷ್ಣತೀಕ್ಷ್ಣಾಂಶ ಪ್ರದೇಶವಾಗಿದೆ.
ಕೆಲ ತಿಂಗಳುಗಳ ಹಿಂದೆ ಪ್ರಮುಖ ಅರೇಬಿಕ್ ವ್ಲಾಗರ್ ಒಮರ್ ಫಾರೂಕ್ ತಮ್ಮ ಯೂಟ್ಯೂಬ್ ವಾಹಿನಿಯ ಮುಖಾಂತರ ‘ಮೌರಿಟಾನಿಯಾದ ಸೂಪರ್ ಮೆಮೊರೈಝರ್ಸ್’ ಎಂಬ ತಮ್ನೈಲಿನಲ್ಲಿ ಪ್ರಸಾರ ಮಾಡಿದ ವಿಡಿಯೋ ಒಂದರಲ್ಲಿ ಅಲ್ಲಿನ ಜನರ ಬುದ್ಧಿ ಕುಶಾಗ್ರಾಮತೆಯ ಕುರಿತು ಹಂಚಿಕೊಳ್ಳುತ್ತಾರೆ. ಅವರ ಏಕಾಗ್ರತೆ ಮತ್ತು ಆಧುನಿಕತೆಯೊಂದಿಗಿನ ಅಂತರ ಕಾಯ್ದುಕೊಳ್ಳುವಿಕೆಯನ್ನು ಅವರು ತಮ್ಮ ವೀಡಿಯೊದಲ್ಲಿ ಒತ್ತಿ ಹೇಳುತ್ತಾರೆ.
ಜಾಗತಿಕ ಮಟ್ಟದಲ್ಲಿ ತಂತ್ರಜ್ಞಾನ ಹಾಗೂ ಅದರ ಅನುಬಂಧಿತ ವ್ಯವಸ್ಥೆಗಳು ಮಾನವನ ಕೌಶಲ್ಯಗಳನ್ನು ಹತ್ತಿಕ್ಕುತ್ತಿರುವ ಈ ಹಂತದಲ್ಲಿ, ಸಹರಾ ಮರುಭೂಮಿಯ ಹೃದಯ ಭಾಗದಲ್ಲಿ ವಾಸಿಸುವ ಈ ಜನರು ತಮ್ಮ ಸಂಪ್ರದಾಯವನ್ನು ಉಳಿಸಿಕೊಂಡ ರೀತಿ ಜಗತ್ತಿಗೆ ಕೌತುಕ ಉಂಟುಮಾಡಿದೆ. ಅತ್ಯಾಧುನಿಕ ತಂತ್ರಜ್ಞಾನ ವ್ಯವಸ್ಥೆ, ಉತ್ತಮ ಸೌಲಭ್ಯಗಳ ಅಲಭ್ಯತೆಯ ನಡುವೆಯೂ ಜ್ಞಾನಾರ್ಜನೆಯೊಂದಿಗಿನ ತಮ್ಮ ಆಸ್ಥೆ ಮೌರಿಟಾನಿಯಾದ ಜನರನ್ನು ಅಧ್ಯಯನ ಕ್ಷೇತ್ರದಲ್ಲಿ ಜಾಗತಿಕವಾಗಿ ವ್ಯತಿರಿಕ್ತಗೊಳಿಸುತ್ತದೆ.
ಅಟ್ಲಾಂಟಿಕ್ ಸಮುದ್ರ ಕಿನಾರೆಯಲ್ಲಿರುವ ಈ ಭೂಪ್ರದೇಶ ಭೌಗೋಳಿಕವಾಗಿ ಹಲವಾರು ಸವಾಲುಗಳನ್ನು ಎದುರಿಸುತ್ತಿದ್ದರೂ, ಉಚ್ಛ ಸಂಸೃತಿ ಮತ್ತು ಸಂಪ್ರದಾಯಗಳಿಂದ ಸಂಪನ್ನಗೊಂಡಿದೆ. ಹತ್ತು ಲಕ್ಷಕ್ಕೂ ಮಿಕ್ಕ ಕವಿಗಳನ್ನು ಜನ್ಮವೆತ್ತ ಭೂಮಿ ಎಂಬ ಖ್ಯಾತಿ ಈ ಮಣ್ಣಿಗಿದೆ. ಅದಕ್ಕಿಂತಲೂ ಮಿಗಿಲಾಗಿ ಇಂದು ಇದು ‘ಹತ್ತು ಲಕ್ಷ ಖುರ್ಆನ್ ವಿದ್ವಾಂಸರ ನಾಡು’ ಎಂಬುದು ಈ ಪ್ರದೇಶವನ್ನು ಹೊರ ಜಗತ್ತಿನಿಂದ ಇನ್ನಷ್ಟು ವ್ಯತಿರಿಕ್ತಗೊಳಿಸುತ್ತದೆ. ಒಟ್ಟು ಜನಸಂಖ್ಯೆಯಲ್ಲಿ ಅಧಿಕ ಶೇಕಡಾವಾರೂ ಹಾಫಿಝ್ ಗಳು. ಸಾಂಪ್ರದಾಯಿಕ ಧಾರ್ಮಿಕ ಶಿಕ್ಷಣ ವ್ಯವಸ್ಥೆಯನ್ನು ಜಗತ್ತಿನ ಮುಂದೆ ತೋರಿಸುವುದರೊಂದಿಗೆ, ಮನುಷ್ಯ ಮಸ್ತಿಷ್ಕದ ಚಲನಾ ಪರಿಯನ್ನು ನೋಡುಗರ ಮುಂದಿಡುವ ಶ್ರಮವೂ ಆಗಿತ್ತು ಇಲ್ಲಿ ಒಮರ್ ಅವರದ್ದು.
“ಮೌಟ ಮೌಲಾನಾ” ಎಂಬ ಗ್ರಾಮವು ಮೌರಿಟಾನಿಯಾದ ಜ್ಞಾನ ತೇಜಸ್ಸಿನ ಒಂದು ತುಣುಕಾಗಿ ನೆಲೆನಿಂತಿದೆ. ಕಿಕ್ಕಿರಿದ ನಗರದ ಜನಜಂಗುಳಿ, ಡಿಜಿಟಲ್ ಜಗತ್ತಿನ ನೋಟಿಫಿಕೇಷನ್’ಗಳು ಮೌಟಾ ಮೌಲಾನಾ ಗ್ರಾಮದ ನಿಶಬ್ಧತೆಯನ್ನು ಎಂದಿಗೂ ಭೇದಿಸುವುದಿಲ್ಲ. ಇಲ್ಲಿ ಮಧ್ಯರಾತ್ರಿ ಎರಡರ ವೇಳೆಯೇ ತಮ್ಮ ದಿನಚರಿ ಪ್ರಾರಂಭಗೊಳ್ಳುತ್ತದೆ. ಜಗತ್ತು ಗಾಢ ನಿದ್ರೆಯಲ್ಲಿರುವಾಗ ಇಲ್ಲಿನ ಗ್ರಾಮೀಣರು ಜ್ಞಾನಾರ್ಜನೆಯ ಮಹಾಜಗತ್ತಿಗೆ ಪಯಣ ಬೆಳೆಸುತ್ತಾರೆ. ಪ್ರಾಯ ಪರಿವೆಯಿಲ್ಲದೆ ಇಡಿಯ ಗ್ರಾಮವೇ ತಮ್ಮನ್ನು ಕಲಿಕೆಯಲ್ಲಿ ತೊಡಗಿಸಿಕೊಳ್ಳುವುದು ಕಾಣುವಾಗ, ಆ ಗ್ರಾಮವೇ ಒಂದು ವಿಶ್ವವಿದ್ಯಾನಿಲಯದಂತೆ ಭಾಸವಾಗುತ್ತದೆ. ‘ಮಹ್’ದರ’ ಎಂದು ಕರೆಯಲ್ಪಡುವ ಅಲ್ಲಿನ ಕಲಿಕಾ ಕೊಠಡಿಗಳಿಗೆ ಸಾವಿರಾರು ವರ್ಷಗಳ ಕಥೆ ಹೇಳಲಿಕ್ಕಿದೆ. ಲೇಖನಿಯನ್ನು ಶಾಯಿಯಲ್ಲಿ ಅದ್ದಿ ಮರದ ಹಲಗೆಗಳ ಮೇಲೆ ಬರೆಯುವ ಹವ್ಯಾಸ ಇಂದಿಗೂ ಇಲ್ಲಿ ಕಾಣಬಹುದು. ಆಧುನಿಕ ಸ್ಮಾರ್ಟ್ ಮೊಬೈಲುಗಳಿಗೆ ನೀಡಲು ಅಸಾಧ್ಯವಾದ ಗಾಢ ಶ್ರದ್ಧೆ ಮತ್ತು ಇಚ್ಛಾಶಕ್ತಿಯನ್ನು ಅದು ವಿದ್ಯಾರ್ಥಿಗಳಿಗೆ ನೀಡುತ್ತದೆ. ಈ ಪ್ರಕ್ರಿಯೆಯು ಅಪೂರ್ವ ಬುದ್ಧಿಶಕ್ತಿಯನ್ನೂ ನೀಡುತ್ತದೆ. ಅರೇಬಿಕ್ ವ್ಯಾಕರಣ ಗ್ರಂಥಗಳ ಪೈಕಿ ಸಾವಿರ ಪದ್ಯಸಾಲುಗಳಿರುವ ‘ಅಲ್ಫಿಯತ್ ಇಬ್ನ್ ಮಾಲಿಕ್’ ನಿರಾಯಾಸ ಅಲ್ಲಿನ ವಿದ್ಯಾರ್ಥಿಗಳು ಹಾಡುವುದರ ಹಿಂದೆ ಅವರ ಈ ರೀತಿಯ ಕಲಿಕಾ ಕೌಶಲ್ಯಗಳ ಪಾತ್ರವೂ ಅಡಗಿದೆ.
ಜಗತ್ತಿನ ವಿವಿಧ ಪ್ರದೇಶಗಳಿಂದ ಜನರು ವಿದ್ಯಾರ್ಜನೆಯ ನಿಮಿತ್ತ ಮೌರಿಟಾನಿಯಾದ ಮಣ್ಣಿಗೆ ತಲುಪಲು ಪ್ರೇರಣೆ ಅಲ್ಲಿನ ಭೌಗೋಳಿಕ ಸೌಲಭ್ಯಗಳಲ್ಲ, ಹೊರತಾಗಿ ಕಾಲಾಂತರಗಳಲ್ಲಿ ತಂತ್ರಜ್ಞಾನ ನಿಮಿತ್ತ ನಷ್ಟಹೊಂದಿದ ಮಾನವನ ನೆಮ್ಮದಿ ಹಾಗೂ ಏಕಾಗ್ರತೆಯನ್ನು ಮರಳಿ ಪಡೆಯುವ ಹುಮ್ಮಸ್ಸು ಅವರನ್ನು ಇಲ್ಲಿಗೆ ತಲುಪಿಸುತ್ತಿದೆ. ಅಮೆರಿಕಾ, ಅಷ್ಟ್ರೇಲಿಯಾದಿಂದ ತಲುಪುವ ಜನರಿಗೆ ಈ ಮರುಭೂಮಿಯ ಸರಳ ಜೀವನ ಬಹಳ ಉತ್ಸುಕತೆಯನ್ನು ನೀಡುತ್ತದೆ. ಯಾವುದೋ ಒಂದು ನೌಕರಿಗಾಗಿ ಮಾತ್ರ ಪದವಿಗಳ ಬೆನ್ನೇರಿ ಹೊರಡುವ ಜಗತ್ತಿನ ಮುಂದೆ, ಸಣ್ಣ ಮಕ್ಕಳ ಆಳಜ್ಞಾನ ನಿಬ್ಬೆರಗುಗೊಳಿಸುತ್ತದೆ.
ಏಕಾಗ್ರತೆ ಮತ್ತು ನಿರಂತರ ತರಬೇತಿಯ ಮೂಲಕ ಜ್ಞಾನಜಗತ್ತಿನಲ್ಲಿ ಉನ್ನತ ಮಟ್ಟಕ್ಕೆ ತಲುಪಬಹುದು ಎಂಬುದನ್ನು ಮೌರಿಟಾನಿಯಾದ ಮಹದರಗಳು ಜಗತ್ತಿನ ಮುಂದೆ ಸಾಬೀತು ಪಡಿಸುತ್ತಿದೆ. ಅದು ಆಧುನಿಕತೆ ಮತ್ತು ಸಾಂಪ್ರದಾಯಿಕತೆಯ ಮಧ್ಯೆ ಇರುವ ಚರ್ಚೆ ಅಲ್ಲ ಹೊರತು, ಮಾನವನ ಬುದ್ಧಿಶಕ್ತಿಯನ್ನು ಪರಿಮಿತಗೊಳಿಸುತ್ತಿರುವ ಬಾಹ್ಯಶಕ್ತಿಗಳನ್ನು ಎದುರಿಸಿ ಜ್ಞಾನಾರ್ಜನೆಯನ್ನು ಹೇಗೆ ಪಡೆಯಬಹುದು ಎಂಬ ಕಲೆಯನ್ನು ಮೌರಿಟಾನಿಯ ಜಗತ್ತಿನ ಮುಂದಿಡುತ್ತಿದೆ. ಪ್ರತಿಯೋರ್ವ ವಿದ್ಯಾರ್ಥಿಯೂ ಇಲ್ಲಿ ಉಪಯೋಗಿಸುತ್ತಿರುವ ಮರದ ಹಲಗೆಗಳು ಆಧುನಿಕ ಜಗತ್ತಿನ ಸ್ಮಾರ್ಟ್ ಸ್ಕ್ರೀನ್’ಗಳಿಗಿಂತ ಪ್ರಕಾಶಪೂರಿತ ಸಂದೇಶವನ್ನು ನಮಗೆ ನೀಡುತ್ತಿದೆ.
“ಈ ಗ್ರಾಮ ಮರುಭೂಮಿಯ ಮಧ್ಯೆ ಅಡಗಿಕೊಂಡಿರುವ ಟೈಮ್ ಕ್ಯಾಪ್ಸುಯೆಲ್” ಎಂದಾಗಿದೆ ಒಮರ್ ಇದನ್ನು ವಿಶೇಷಿಸುವುದು. ಸರಳ ಜೀವನದ ಮೂಲಕ ಗಾಢ ಏಕಾಗ್ರತೆಯನ್ನು ಬೆಳೆಸಿಕೊಂಡರೆ ಉತ್ತಮ ಜ್ಞಾನಿಯಾಗಬಹುದು ಎಂಬುದನ್ನು ಮೌರಿಟಾನಿಯಾ ಇಂದಿಗೂ ಸಾಬೀತುಪಡಿಸುತ್ತಲೇ ಇದೆ. ಜಗತ್ತು ಇಂಟರ್ನೆಟ್ ಮತ್ತು ತಂತ್ರಜ್ಞಾನಗಳ ಹಿಂದೆ ಶರವೇಗದಿಂದ ಓಡುತ್ತಿರುವ ಈ ವೇಳೆ, ಏಕಾಗ್ರತೆಯ ಮೂಲಕ ‘ಸೂಪರ್ ಹ್ಯೂಮನ್ಸ್’ಗಳಾಗಿ ಸರಳ ಜೀವನ ಸಾಗಿಸುತ್ತಿರುವ ಒಂದು ಜನಾಂಗ ಇಂದಿಗೂ ಈ ಭೂಮಿಯಲ್ಲಿದೆ ಎಂಬುವುದನ್ನು ನೆನಪಿಸುತ್ತಲೇ ಇರಬೇಕು.
ಸಜ್ಜಾದ್ ಪಾರಕ್ಕಡವ್
ಕ ~ ಅಬ್ದುಸ್ಸಲಾಮ್ ಮುಈನಿ ಮಿತ್ತಾರಾಜೆ.
